SPAK ka shpallur pretencën për ish-drejtorët e Autoritetit Rrugor Shqiptar, Evis Berberi dhe Gentian Gjyli, në një çështje që lidhet me shkeljen e barazisë në tendera dhe ankande publike, të kryera në bashkëpunim për disa procedura prokurimi. Çështja është shqyrtuar me procedurë të gjykimit të shkurtuar.
Prokuroria e Posaçme ka kërkuar dënimin me 10 vite burg për Evis Berberin, i akuzuar për pesë raste të shkeljes së barazisë në tendera, gjashtë raste të korrupsionit pasiv dhe një rast të pastrimit të parave. Për shkak të gjykimit të shkurtuar, dënimi i tij pritet të ulet në rreth 6.8 vite burg.
Për Gentian Gjylin, gjithashtu ish-drejtor i ARRSH, SPAK ka kërkuar 1.6 vite burg për dy raste të shkeljes së barazisë në tendera, si dhe ndalimin e ushtrimit të funksioneve publike për një periudhë prej 5 vitesh.
Ndërkohë, për Erald Elezin, ish-drejtor i KESH, është kërkuar dënimi me 1.6 vite burg për shkelje të barazisë në tendera, i cili ulet me një të tretën për shkak të gjykimit të shkurtuar, si dhe heqja e të drejtës për të mbajtur funksione publike për 5 vite.
Prokurori i SPAK, Dritan Prençi, paraqiti gjithashtu konkluzionet përfundimtare për 20 të pandehur të tjerë në këtë dosje.
SPAK ka kërkuar edhe konfiskimin e shumave të parave të sekuestruara në banesën e Evis Berberit.
