Arne Slot ka reaguar pas shkarkimit nga posti i trajnerit të Liverpool, duke deklaruar se largohet me bindjen se e ka lënë klubin “aty ku i takon: mes elitës së Evropës”.
Trajneri holandez fitoi Premier League në sezonin e tij të parë në “Anfield”, por u largua pas një sezoni zhgënjyes, ku Liverpool e mbylli kampionatin në vendin e pestë, 25 pikë pas Arsenal kampion.
Në një letër të hapur për tifozët, Slot falënderoi mbështetësit e Liverpool për përkrahjen që i dhanë që nga dita e parë, duke theksuar se kjo do të mbetet gjithmonë e veçantë për të.
“Largohem me besim të plotë për atë që vjen më pas. Lojtarët kanë dhënë shumë për këtë klub dhe kanë ndërtuar baza që do të qëndrojnë”, shkroi ai.
Pavarësisht vështirësive dhe 20 humbjeve në të gjitha kompeticionet, Slot siguroi kualifikimin e Liverpool në Champions League për sezonin e ardhshëm, diçka që e cilësoi si një përgjegjësi të rëndësishme.
Holandezi kujtoi edhe titullin e Premier League, duke thënë se ai sukses i përket të gjithëve: klubit, lojtarëve dhe tifozëve që e përjetuan së bashku pas pritjes së gjatë.
Liverpool pritet të nisë bisedimet me Andoni Iraola, ish-trajnerin e Bournemouth, për ta emëruar si trajnerin e ri të skuadrës.
