Arne Slot ka deklaruar se ndihet plotësisht i mbështetur nga drejtuesit e Liverpool dhe nga tifozët, pavarësisht rezultateve të dobëta të fundit dhe zërave që kanë nisur të qarkullojnë për të ardhmen e tij në “Anfield”.
Trajneri holandez, i cili mori drejtimin e skuadrës në qershor të vitit 2024 pas largimit të Jurgen Klopp, fitoi Premier League në sezonin e tij të parë, por tani po përballet me një moment të vështirë. Liverpool ndodhet në vendin e pestë dhe vetëm shtatë pikë e ndajnë nga Bournemouth i vendit të 13-të, ndërsa skuadra ka marrë vetëm një pikë në tre ndeshjet e fundit në kampionat. Humbja 2-1 ndaj Brighton, eliminimi 4-0 nga Manchester City në FA Cup dhe disfata 2-0 ndaj PSG në çerekfinalen e parë të Champions League kanë shtuar presionin mbi teknikun.
Megjithatë, Slot nuk duket i shqetësuar për të ardhmen e tij. Ai theksoi se ndjen shumë mbështetje nga pronarët e klubit, si edhe nga drejtuesit Richard Hughes dhe Michael Edwards. Po ashtu, ai vlerësoi edhe tifozët, të cilët, sipas tij, kanë vazhduar të qëndrojnë pranë skuadrës edhe në momentet më të vështira.
“Po e përsëris shpesh, por ndiej shumë mbështetje. Jo vetëm nga pronarët, por edhe nga Richard dhe Michael. Dhe, sado e çuditshme të duket, e ndiej edhe nga tifozët. Në Paris, kur lojtarët dolën për nxehmje dhe edhe pas humbjes 4-0 ndaj Manchester City, tifozët nisën menjëherë të këndonin ‘we love Liverpool’. Edhe pse u dominuam për 90 minuta, ata vazhduan të këndonin dhe të na duartrokisnin. Klubi e di shumë mirë periudhën ku ndodhemi dhe unë ndihem plotësisht i mbështetur”, u shpreh Slot.
Trajneri shtoi se humbja ndaj PSG duhet të shërbejë si motivim në këtë periudhë vendimtare të sezonit. Ai tha se përballë kampionëve të Europës Liverpool kuptoi se nuk ishte në nivelin e duhur, por skuadra ka katër ose pesë ditë për të treguar se mund të jetë shumë më konkurruese. Sipas tij, kjo sfidë duhet të shërbejë edhe si shtysë për t’u rikthyer sezonin e ardhshëm në atë nivel, por për këtë Liverpool duhet të bëjë mirë edhe në kampionat.
Në fund, Slot foli edhe për Andy Robertson, i cili ka njoftuar se do të largohet nga klubi në fund të sezonit, kur t’i përfundojë kontrata. Trajneri e vlerësoi mbrojtësin skocez si një lojtar me intensitet të jashtëzakonshëm dhe si një person shumë të rëndësishëm në dhomat e zhveshjes. Ai kujtoi se Robertson ka fituar gjithçka me Liverpool dhe e do vërtet klubin, por pranoi se mungesa e minutave këtë sezon ka ndikuar në vendimin e tij për t’u larguar.
