Kabineti i Presidentit të Malit të Zi, Jakov Millatoviq, ka kërkuar që filmi “Lejleku” i regjisorit Isa Qosja të shfaqet sërish, pas ndërprerjes së tij të dhunshme më 3 shtator. Skena e filmit, që ishte në gjuhën shqipe, shkaktoi reagime negative nga disa qytetarë, të cilët e kundërshtuan shfaqjen.
Sipas deklaratës nga kabineti, policia dhe Zyra e Prokurorit duhet të identifikojnë autorët e dhunës dhe t’i ndjekin ata penalisht.
Organizatorët e festivalit Xhada, ku u shfaq filmi, përshkruan ngjarjen si një “situatë të pakëndshme” dhe ndërprerjen si një masë sigurie. Dëshmitarët njoftuan se disa pjesëmarrës filluan të bërtasin dhe të kërkojnë ndërprerjen e filmit sapo filloi të fliste shqip.
Njëri nga dëshmitarët, Jasmin Muriq, theksoi se situata u tensionua dhe se ata që protestuan u treguan agresivë, duke kërcënuar organizatorët dhe duke kërkuar ndalimin e filmit.
Producenti i filmit, Ivan Gjuroviq, e quajti situatën si pasojë e një shoqërie të helmuar, duke theksuar se “Lejleku” trajton pozita të vështira të grave, dhe se filmi reflektonte një diversitet kulturore që përfshinte artistë nga rajone të ndryshme.
Ai kritikoi qeverinë për neglizhencën ndaj ndërtimit të një shoqërie të shëndetshme dhe theksoi se incidenti ishte një shenjë e një krize më të gjerë shoqërore.
Disa parti politike dhe përfaqësues të shoqërisë civile kërkuan masa të menjëhershme për të ndëshkuar autorët e dhunës dhe për të mbrojtur artin dhe dinjitetin e qytetarëve.
Kryetari i Bashkësisë Islame në Mal të Zi e quajti ndërprerjen si një sulm ndaj diversitetit kulturor, ndërsa zëvendëskryeministri Nik Gjeloshaj theksoi se ky incident nuk është thjesht çështje e komunitetit shqiptar, por një problem që ka të bëjë me të gjithë vendin.
Delegacioni i Bashkimit Evropian në Mal të Zi gjithashtu e shprehu mbështetje për lirinë e shprehjes artistike si një nga vlerat fondamentale demokratike.
