Tre persona u arrestuan në lidhje me një laborator droge, i cili u zbulua brenda një ndërtese katërkatëshe përgjatë aksit rrugor Lezhë–Milot.
Në një seancë gjyqësore të zhvilluar me dyer të mbyllura në Gjykatën e Lezhës, u vendos që Arben Gjergji, 57 vjeç, dhe djali i tij, Arnold Gjergji, 22 vjeç, do të mbahen në arrest në burg për aktivitetin e tyre kriminal.
Ndërsa për një punonjës të OSHEE-së, Gjon Doda, u vendos masa e arrestit në shtëpi për shpërdorim detyre.
Laboratori i drogës u zbulua pasditen e së hënës, dhe gjatë kontrollit u gjetën dhe u sekuestruan 8.8 kg lëndë e dyshuar narkotike kanabis, 1064 bimë të dyshuara narkotike kanabis, si dhe 960 fidanë kanabisi.
Gjithashtu, ishin sekuestruar 850 fara kanabisi, 106 llamba me transformator për kultivimin e bimëve narkotike, dhe një gamë e madhe armësh, përfshirë një armë zjarri automatike dhe një pistoletë sportive.
Duke vazhduar në hetimet e saj, policia ka shkuar edhe në banesat e personave të arrestuar, ku gjeti 180 gramë lëndë të dyshuar narkotike kokainë, një pistoletë me mulli, si dhe një armë zjarri pushkë.
