Një ngjarje e rëndë është raportuar në Itali, ku një 47-vjeçare shqiptare ka humbur jetën si pasojë e kancerit të mitrës, pas një gabimi në diagnozë. Gruaja kishte kryer tre Pap teste në një laborator mjekësor gjatë viteve 2016–2019 dhe të gjitha kishin rezultuar negative, duke përjashtuar praninë e infeksioneve apo problemeve serioze shëndetësore.
Megjithatë, disa vite më vonë u zbulua se analizat kishin qenë të pasakta. Ndërkohë sëmundja kishte vazhduar të përparonte në heshtje deri në diagnostikimin e karcinomës skuamoze të mitrës. Sipas mediave italiane, 47-vjeçarja iu nënshtrua cikleve të gjata të kimioterapisë, si trajtimeve tradicionale ashtu edhe atyre eksperimentale, por gjendja e saj u përkeqësua gradualisht.
Ajo ndërroi jetë në nëntor të vitit 2023. Për të shmangur një proces gjyqësor, laboratori që kishte raportuar testet zgjodhi të arrijë një marrëveshje ekonomike me familjarët e viktimës, duke i dëmshpërblyer ata me 300 mijë euro.
