Në fjalën e saj në Komisionin e jashtëm të Parlamentin Evropian, Komisionerja për Zgjerimin Marta Kos deklaroi se brenda vitit 2029 Shqipëria mund të ulet e barabartë mes 27 vendeve të unionit.
Ajo theksoi se BE është e gatshme të anëtarësoj të paktën një vend brenda këtij mandati.
“Kemi një mundësi reale që të sjellim një apo më shumë vende candidate ne vijën e finishit gjatë këtij mandati. Me Shqipërinë, kemi hapur tashmë 24 kapituj, vetëm në dy muajt e fundit kemi hapur grupkapitullin e dytë dhe të tretë . Kemi parë përparim konkret dhe jam e bindur që do të shohim edhe më shumë arritje para përfundimit të këtij semestri. Disa vende kandidate e kanë kuptuar se momenti i ri për zgjerimin është serioz dhe po i zbatojnë reformat më shpejt se kurrë më parë”, tha Komisionerja për Zgjerimin Marta Kos.
Kos vlerësoi punën e bërë deri më tani në lidhje me zbatimin e reformave, por nënvizoi se procesi bazohet në meritë.
“Uniteti vjen edhe nga vlerat e përbashkëta. Kjo është arsyeja pse këmbëngulim që procesi të bazohet në meritë. Vendet kandidate duhet të zotërojnë reformat e tyre, të ndërtojnë institucione demokratike të qëndrueshme dhe ekonomi të qëndrueshme. Në të gjitha këto, sundimi i ligjit dhe vlerat themelore janë të panegociueshme”, u shpreh Kos.
Pak ditë më parë në një konference në Bruksel, Komisionerja deklaroi se vendi ynë do të hapë të gjithë kapitujt negociues brenda muajit qershor.
