Kombëtarja shqiptare luan këtë të martë të 14 tetorit, miqësoren ndaj Jordanisë, në stadiumin “Air Albania”. Kuqezinjtë synojnë suksesin e radhës, pas fitores historike me Serbinë pak ditë më parë në Leskovac.
Sfida Shqipëri-Jordani, do të luhet duke nisur nga ora 19:00, teksa pak minuta para fillimit të takimit, janë zbuluar edhe formacionet zyrtare, me të cilat do të zbresin ekipet në fushë.
Pas fitores me Serbinë, trajneri Silvinjo ka vendosur të bëjë ndryshime të mëdha në formacionin e kuqezinjve në krahasim me ndeshjen në Leskovac, duke u dhënë mundësinë të tregojnë veten edhe futbollistëve që kanë luajtur më pak në ndeshjet e fundit.
Ndryshimet e Silvinjos nisin nga porta ku luan Mario Dajsinani, për të vazhduar me mbrojtjen ku është ndryshuar gjysma e futbollistëve pasi Ivan Balliu dhe Enea Mihaj do të përbëjnë krahun e djathtë të prapavijës. Në mesfushë, Asllani dhe Shehu ruajnë vendin, ndërsa Nedim Bajrami vendoset në vend të Laçit.
Kurse sulmuesi është ribërë nga e para me treshen Hoxha-Asani-Daku që luan në vend të asaj Uzuni-Broja-Manaj që zbriti në fushë nga minuta e parë kundër Serbisë.
