Manchester City ka pësuar një tjetër goditje, duke u mundur 1-0 nga Brighton në Etihad dhe duke regjistruar humbjen e tretë që prej vendimit të komisionit hetimor të Premier League.
Goli i vetëm i sfidës erdhi në minutën e 11-të. Pas një aksioni në zonë, topi përfundoi te Ayari, i cili nuk gaboi dhe kaloi Brighton në avantazh.
City reagoi dhe krijoi disa mundësi të mira. Nunes provoi me kokë, Ndiaye testoi Verbruggen, ndërsa Haaland pa tentativën e tij të ndalej në vijën fatale nga Dunk.
Në pjesën e dytë presioni i vendasve u rrit. Ndiaye goditi traversën, ndërsa Verbruggen u bë sërish protagonist me një pritje të rëndësishme ndaj Nunes.
Pavarësisht hyrjes së Cherki dhe shtimit të forcave në sulm, skuadra e City nuk arriti të gjente golin e barazimit.
Në minutat e fundit, Brighton pati madje mundësinë të dyfishonte rezultatin me Hinshelwood, por tentativa e tij përfundoi në rrjetën anësore.
Brighton siguroi kështu një fitore të madhe dhe ngjitet vetëm dy pikë larg kreut, ndërsa Manchester City vazhdon një periudhë negative. Para vendimit të Premier League, skuadra kishte fituar çdo ndeshje; që prej tij ka pësuar tre humbje, një në Champions League dhe dy radhazi në kampionat.
City mbetet për momentin në krye të renditjes, në pritje të ndeshjes së Arsenalit të dielën.
