Një shpërthim i fuqishëm ndodhi të hënën në mëngjes në një fabrikë fishekzjarresh në Kinën qendrore, duke shkaktuar vdekjen e 9 personave dhe plagosjen e 26 të tjerëve.
Ngjarja ndodhi në fabrikën Shanzhou Firework Co, e cila ndodhet në një zonë malore të qarkut Linli, në veri të qytetit Changde, në provincën Hunan.
Pas shpërthimit një re e madhe tymi u ngrit në qiell, ndërsa operacioni për shuarjen e zjarrit u vështirësua për shkak të rrezikut të shpërthimeve të mëtejshme dhe mungesës së një burimi të madh uji.
Sipas mediave vendase, zjarrfikësit përdorën topa uji me telekomandë, 28 cisterna dhe dy kamionë me pompa me fuqi të lartë, për të mbajtur flakët nën kontroll dhe për të parandaluar përhapjen e mëtejshme të zjarrit.
Ministria e Menaxhimit të Emergjencave ka dërguar një ekip pune në vendngjarje, ndërsa shkaku i shpërthimit është ende i paqartë dhe po hetohet nga autoritetet.
