Një shopërthim i fuqishëm raportohet të ketë ndodhur mbrëmjen e sotme në Varagë të Zubin Potok të në Kosovë, duke dëmtuar kanalin e ujit Ibër-Lepenc.
Sipas dyshimeve të para, kanali i dëmtuar i përket Korporatës Energjitike të Kosovës, dhe shërben për të furnizuar atë me ujë në mënyrë që të prodhohet energji elektrike. IliriaNews.al raporton se kjo gjë mund të sjellë shqetësime sa i përket furnizimit të rregullt me energji elektrike në një pjesë të vendit.
Sipas mediave lokale, zëvendësdrejtori i policisë për rajonin e veriut, Veton Elshani, ka konfirmuar ngjarjen, duke deklaruar se forcat policore po punojnë për zbardhjen e rrethanave: “Po, është dëgjuar një shpërthim dhe ekipet janë në terren për hetimin e incidentit.”
Pas shpërthimit, uji ka filluar të rrjedhë në mënyrë të pakontrolluar, duke shkaktuar shqetësim në zonë. Hetimet vazhdojnë për të përcaktuar shkaqet dhe autorët e mundshëm të ngjarjes.
