Kryetarja e Shoqatës së Avokatëve Penalistë të Shqipërisë, Joana Qeleshi, ka reaguar ashpër lidhur me arrestimin e avokatit Ulian Barjami, i cili u ndalua menjëherë pas përfundimit të një seance gjyqësore, gjatë ushtrimit të detyrës së tij.
Ngjarja, e ndodhur pas një debati mes tij dhe prokurorit Gjergji Ceka, është cilësuar si një akt i paprecedentë dhe i papranueshëm nga Shoqata.
Përmes këtij reagimi publik, Qeleshi thekson se arrestimi është një goditje e drejtpërdrejtë ndaj rolit të avokatit në sistemin e drejtësisë dhe cënon rëndë të drejtën për mbrojtje të pavarur dhe të paanshme.
Shoqata e Avokatëve Penalistë të Shqipërisë kërkon:
1. Lirimin e menjëhershëm dhe pa kushte të avokatit të arrestuar;
2. Hetim të plotë, të pavarur dhe transparent mbi veprimet e autoriteteve përgjegjëse;
3. Marrjen e masave disiplinore dhe ligjore ndaj çdo funksionari që ka keqpërdorur detyrën publike për të intimiduar përfaqësuesin e mbrojtjes;
4. Garanci institucionale që ngjarje të tilla të mos përsëriten më.
Reagimi i plotë:
Shoqata e Avokatëve Penalistë të Shqipërisë shpreh indinjatën e saj të thellë dhe dënon me forcë aktin e paprecedentë të arrestimit të avokatit Ulian Bajrami gjatë ushtrimit të detyrës së tij me përfundimin e një seance gjyqësore, pas një debati gjatë gjykimit me përfaqësuesin e organit të akuzës.
Sipas informacioneve të bëra publike dhe audios së seancës gjyqësore, avokati Ulian Bajrami u arrestua vetëm për faktin se i komunikoi prokurorit synimin për të bërë kallëzim penal, pasi sipas avokatit ky i fundit kishte manipuluar provat në dëm të klientit që ai mbronte.
Ky veprim përbën një sulm të drejtpërdrejtë ndaj pavarësisë së profesionit të avokatit, duke cenuar rëndë parimin kushtetues të së drejtës për mbrojtje të pavarur dhe efektive, të garantuar nga neni 31 i Kushtetutës dhe neni 6 i Konventës Europiane për të Drejtat e Njeriut.
Avokati, si pjesë thelbësore e sistemit të drejtësisë, nuk mund dhe nuk duhet të ndëshkohet për ushtrimin e funksionit të tij ligjor në mbrojtje të interesave të qytetarit dhe përballjen e abuzimeve të pushtetit.
Arrestimi i një avokati për shkak të ushtrimit të detyrës është një akt i papranueshëm, që dëmton seriozisht besimin e publikut tek drejtësia dhe cënon ekuilibrin e procesit të rregullt ligjor.
Shoqata e Avokatëve Penalistë të Shqipërisë kërkon:
1. Lirimin e menjëhershëm dhe pa kushte të avokatit të arrestuar;
2. Hetim të plotë, të pavarur dhe transparent mbi veprimet e autoriteteve përgjegjëse;
3. Marrjen e masave disiplinore dhe ligjore ndaj çdo funksionari që ka keqpërdorur detyrën publike për të intimiduar përfaqësuesin e mbrojtjes;
4. Garanci institucionale që ngjarje të tilla të mos përsëriten më.
