Shkarkimi i Liam Rosenior pas vetëm 103 ditësh në krye të Chelsea-t nuk përbën vetëm një goditje të madhe për imazhin e klubit, por edhe një kosto tepër të rëndë në aspektin financiar.
Sipas raportimeve, trajneri anglez kishte firmosur në janar të vitit 2026 një kontratë afatgjatë deri në vitin 2032. Për këtë arsye, ndërprerja e parakohshme e marrëveshjes aktivizon detyrime të konsiderueshme financiare për klubin londinez.
Më konkretisht, Chelsea pritet t’i paguajë Roseniorit një dëmshpërblim rreth 24 milionë paund, ose afërsisht 28 milionë euro. Një shifër shumë e lartë, që e rëndon edhe më shumë bilancin e klubit në një periudhë ku janë shpenzuar tashmë shumë para për largimet e trajnerëve të mëparshëm.
Kjo pagesë i shtohet kostove të mëdha që Chelsea ka përballuar vitet e fundit për shkëputjen e kontratave me emra si Graham Potter, Mauricio Pochettino dhe Enzo Maresca. Një tjetër vendim i kushtueshëm, që tregon sa i lartë ka qenë çmimi i paqëndrueshmërisë në pankinën e klubit londinez.
