Protesta e pasdites së sotme e partive të reja për hedhjen nga pallati të policit Azbi Spahiu, u kthye në përplasje mes përfaqësuesve të tyre konkretisht Arlind Qorit të “Lëvizjes Bashkë” dhe Adriatik Lapajt të “Shqipëria Bëhet”.
Shkak i përplasjes duket se u bë radha se kush duhet të flasë i pari në podium dhe se kush janë organizatorët e vërtetë të protestës. Nuk kanë munguar akuzat e përfaqësuesve të Arlind Qorrit të cilët e kanë quajtur Adriatik Lapajn si të shitur, ndërsa ky i fundit i ka cilësuar si komunistë.
Për këtë ngjarje që ka marrë shumë kritika për sjelljen, ka reaguar kryetari i partisë “Nisma Thurje”, Endrit Shabani i cili shprehet se Adriatik Lapaj është dhunuar nga drejtuesit e “Lëvizja Bashkë”, duke filluar që nga Arlind Qori. Ai tha se Lapajn e kanë larguar me dhunë nga protesta dhe i bënin thirrje policisë që ta merrte zvarrë.
“Sapo ndodhi një ngjarje shumë e shëmtuar ku Adriatik Lapaj u dhunua nga drejtuesit e “Lëvizjes Bashkë”, duke filluar që nga Arlind Qori dhe drejtuesit e tjerë, të cilët përveçse e larguan me dhunë nga protesta, i bënin thirrje policisë që ta merrte zvarrë. Tani kjo është e papranueshme. E para sepse ku mentaliteti ku djegim Shqipërinë për karrierën e këtij njeriu, është mentalitet i politikës së vjetër. E dyta ideja që ka pronar kauzash, pronar çështjes, se këtë çështje e kam zënë unë dhe asnjë tjetër nuk duhet të flasi dhe luftojë do të thotë që këta nuk duan ta zgjidhin problemin. Sepse Azbi Spahiu është në spital. Në qoftë se ne bëhemi gjithë bashkë, rrisim presionin për të kuptuar të vërtetën, për tu siguruar që kjo gjë nuk ndodh sërish. Por nëse kta luftojnë me njëri-tjetrin për ta zënë kauzën, këta fitojnë pikë politike, Arlind Qori do bëhet deputet. Por nuk është ky misioni i të rinjve. Nuk është ky mentaliteti i të bërit politikë. Ky është mentaliteti i Sali Berishës, i Ilir Metës, i Edi Ramës. I gjithë atyre që e kanë sjellë Shqipërinë këtu dhe e kanë djegur për karrierën e tyre. Ju lutem tërhiquni nga ky mentalitet nga ky model. Është një model bolshevik, është një model prej të cilit Shqipëia ka vuajtur shumë dhe nuk mund të vahzdojë më. Nuk është kjo e ardhmja. Nuk është kjo mënyra si mund të ecim përpara. Duhet që të rinjtë të bëhen gjithë bashkë dhe të vendosin zgjidhjen e problemeve përpara karrierës apo ambicieve personale të gjithësecilit.”, u shpreh Shabani në reagimin e tij.
