Një sherr i dhunshëm ka ndodhur mbrëmjen e të enjtes në shëtitoren e Sarandës, duke krijuar panik mes qytetarëve dhe turistëve të shumtë që ndodheshin aty.
Disa të rinj u përleshën mes tyre me sende të forta si shkopinj dhe paleta druri. Skena të dhunës ndodhën në mes të shetitores, pranë kalimtarëve që u gjendën të trembur përballë situatës së papritur dhe kaotike.
Zënka mes dy grupeve duket se ka degjeneruar shpejt në dhunë fizike, ndërsa nuk dihet ende shkaku apo nëse ka pasur të lënduar. Ngjarja ka ngjallur shqetësim për sigurinë publike, sidomos në një qytet turistik si Saranda, ku çdo incident i tillë ndikon drejtpërdrejt në imazhin e zonës gjatë sezonit veror.
