Bordi i Transparencës, një mekanizëm që u krijua për të “mbajtur në vijë” çmimin e hidrokarbureve në Shqipëri, vendosi në mbledhjen e djeshme që çmimi i naftës të pësojë një tjetër rritje, pa argumentuar qartë se përse duhet të ndodhë kjo gjë.
Sipas vendimit, prej orës 20:00 të mbrëmjes së djeshme, nafta nuk do të tregtohej më me çmimin e lartë 218 lekë/litër, por me një çmim akoma më të lartë 224 lekë/litër, plot 6 lekë më shumë.
Me vendimin që nafta të tregtohet mbi 220 lekë/litër, ka hyrë automatikisht në fuqi vendimi i qeverisë për të ulur taksën e akcizës 20%, duke lehtësuar disi barrën e rëndë taksore të hidrokarbureve në Shqipëri.
Çmimi i benzinës mbeti i pandryshuar, teksa tabelat e gazit u rritën sipas dëshirës së tregtarëve nga 65 lekë/litër, në 75 lekë/litër, një rritje 10 lekë/litër.
Një qytetar pohoi për “Iliria News” jashtë kamerave se nga sot do ta fikë makinën dhe do ta ndezë një herë në javë, sa për të mbajtur baterinë të karikuar.
“Do t’i lë çelsat te dollapi. Do ta ndez një herë në javë sa mos bjerë bateria,” tha ai.
Sa duhet ta ketë rrogën një qytetar për të përballuar këto çmime?
Përse nuk reagojnë shqiptarët përballë këtyre çmimeve?
Çfarë mendoni se duhet bërë?
