Ky është 12-vjeçari shqiptar Luis Pisha, i cili humbi jetën mbërmejn e djeshme në Bolonja, pasi ra në hapësirën e shkallëve të një pallati tetëkatësh.
Sipas informacioneve paraprake, i mituri kishte hipur në tarracën e ndërtesës bashkë me disa bashkëmoshatarë, ku po bënin foto dhe po luanin. Dyshohet se ai ka shkelur mbi një dritare çatie, e cila është thyer papritur.
12-vjeçari ka tentuar të mbahej, ndërsa shokët janë përpjekur ta ndihmojnë, por nuk kanë arritur ta shpëtojnë. Ai ka rënë nga lartësia e katit të tetë drejt katit përdhes, duke pësuar dëmtime fatale.
Në vendngjarje mbërritën menjëherë shërbimet emergjente të 118 Emergenza Sanitaria, si dhe policia dhe zjarrfikësit, por përpjekjet për ta shpëtuar rezultuan të pasuksesshme.
Mësohet se 12-vjeçari nuk jetonte në pallatin ku ndodhi aksidenti. Pak më vonë në vendngjarje kanë mbërritur prindërit dhe të afërmit e tij, ndërsa skenat e dhimbjes kanë qenë rrëqethëse.
Nëna e të miturit, e tronditur, është shembur në tokë mes lotësh, duke kërkuar të dijë se çfarë kishte ndodhur me të birin.
“Ka vdekur, më thoni çfarë ndodhi”, ishin fjalët rrëqethëse të nënës së 12-vjeçarit.
Policia vijon hetimet për të zbardhur plotësisht rrethanat e kësaj ngjarjeje të rëndë.
