Në Shtetet e Bashkuara, Ministria e Jashtme ka filluar të revokojë dhe të mohojë viza për individë që festojnë vrasjen e aktivistit konservator Charlie Kirk, sipas Sekretarit të Shtetit, Marco Rubio.
Ai shprehu se Amerika nuk do të pranojë të huaj që glorifikojnë vdekjen e qytetarëve të saj. Në postimin e tij në rrjetin social X, Rubio njoftoi se ata që ndodhen në SHBA me vizë dhe që festojnë vrasjen e një figure politike duhet të përgatiten për deportim.
Pasiguria mbetet mbi numrin e vizave të revokuara apo të mohuara dhe arsyet e saktë për veprimet e Departamentit të Shtetit. Po ashtu, nuk është e qartë nëse ndonjë qytetar evropian është prekur nga kjo politikë.
Charlie Kirk, 31 vjeç, u qëllua për vdekje më 10 Shtator ndërsa mbante një fjalim për studentët në Universitetin e Utah Valley. Ishte 22-vjeçari Tyler Robinson, i cili u arrestua pas një kërkimi 33-orësh, dhe akuzohet për vrasjen e Kirk.
Pas këtij incidenti, konservatorët në SHBA kanë kritikuar ata që e kanë ofenduar Kirkun ose janë tallur me vdekjen e tij. Raportet sugjerojnë se disa profesionistë në sektorë si aviacioni, edukimi dhe media e kanë humbur punën ose janë pezulluar për postimet e tyre në rrjetet sociale.
Sekretari amerikan i Transportit, Sean Duffy, tha se American Airlines kishte pezulluar pilotët që festonin vdekjen e Kirkut, duke e cilësuar sjelljen e tyre si të neveritshme.
Administrata e Trump-it ka bërë kërcënime për të ndëshkuar atë që ajo e quan “radikalizmi i majtë” pas vrasjes së Kirk, duke ngritur shqetësime se e djathta amerikane po përpiqet të shfrytëzojë zemërimin për të shtypur opozitën politike.
Prokurorja e Përgjithshme, Pam Bondi, e ka akuzuar “radikalizmin e majtë” për këtë akt të dhunshëm dhe ka paralajmëruar për pasojat e gjuhës së urrejtjes.
Ajo theksoi se do të ndjekin penalisht çdo individ që përhap gjuhë urrejtjeje, megjithatë, kjo ka sjellë kritika nga të dyja anët e spektrit politik, për shkak se nuk ekziston një përjashtim për gjuhën e urrejtjes sipas Amendamentit të Parë.
