Eliminimi i Uruguait nga Kupa e Botës ka lënë pasoja të rënda, sidomos për Federico Valverde. Mesfushori i Real Madrid nuk kaloi një turne të lehtë, si për paraqitjet në fushë, ashtu edhe për tensionet jashtë saj.
Uruguai dështoi të kalonte grupin me Cape Verde dhe Arabinë Saudite, një rezultat që në vend konsiderohet zhgënjim i madh. Mes lojtarëve më të kritikuar ishte pikërisht Valverde, i cili u përfshi edhe në grupin e futbollistëve që patën përplasje me Marcelo Bielsa para ndeshjes vendimtare ndaj Spanjës.
Në atë sfidë, Valverde u zëvendësua pas pak më shumë se gjysmë ore lojë, me Bielsa që e justifikoi vendimin duke thënë se donte të shtonte më shumë forcë në sulm. Pas eliminimit, zemërimi i tifozëve u drejtua edhe ndaj tij, me kritika të forta për paraqitjen në Botëror dhe në eliminatore.
Për Valverden, kjo nuk është një situatë e izoluar, por vazhdimi i një sezoni të komplikuar. Në aspektin e shifrave, ai ka arritur të ruajë një nivel të mirë me Real Madrid, me 9 gola dhe 13 asiste, por loja e tij nuk ka shkëlqyer si në vitet më të mira.
Problemet më të mëdha kanë ardhur jashtë fushës. Fillimisht u përfol për një raport të tensionuar me Xabi Alonson, pas refuzimit publik për të luajtur si mbrojtës i djathtë, edhe pse më pas Valverde e mohoi këtë. Më vonë, një episod gjatë nxehjes në Almaty u interpretua si sfidë ndaj trajnerit.
Pas largimit të Xabit, uruguaiani ishte një nga lojtarët që mori më shumë kritika nga tifozët. Me Arbeloan, situata dukej më e qetë dhe niveli i lojës u përmirësua, por imazhi i tij tashmë ishte dëmtuar.
Edhe incidenti me Tchouameni e rëndoi më tej situatën. Sipas raportimeve, dy lojtarët patën debate të forta për dy ditë radhazi, ndërsa në ditën e dytë situata përfundoi me tension fizik. Të dy u gjobitën me nga 500 mijë euro dhe u rikthyen në skuadër, por plagët e atij episodi mbeten ende.
Tani, gjithçka kalon në duart e José Mourinhos. Real Madrid e konsideron Valverden një lojtar thelbësor për të ardhmen, ndryshe nga Tchouameni, për të cilin klubi mund të dëgjojë oferta nëse kushtet janë të duhura.
Valverde pritet të jetë kapiteni i parë pas largimit të Carvajal dhe Mourinho synon t’i japë një rol kyç në një Real Madrid më të orientuar drejt kundërsulmeve dhe shfrytëzimit të hapësirave. Lajmi i vetëm pozitiv nga eliminimi i hershëm i Uruguait është se Valverde dhe Mourinho do të kenë mundësi të punojnë së bashku që në fillim të fazës përgatitore.
