Ministri i Mbrojtjes, Ermal Nufi, deklaroi në një konferencë për shtyp se Shqipëria po hyn në një fazë të re të angazhimit të saj në NATO, pas vendimeve të marra në samitin e fundit të Aleancës në Ankara.
Sekretari i Përgjithshëm i NATO-s, Mark Rutte, ka konfirmuar se samiti i ardhshëm i Aleancës do të zhvillohet në Tiranë, ndërsa data dhe koha e mbajtjes së tij do të përcaktohen nga vetë NATO.
“Samiti i fundit i NATO-s në Ankara e vendosi Shqipërinë në një moment të rëndësishëm për rolin e saj në Aleancë. Ky është një vlerësim për kontributin dhe pozicionin strategjik të vendit tonë,” u shpreh ministri.
Nufi theksoi se mjedisi ndërkombëtar i sigurisë ka ndryshuar ndjeshëm dhe se konfliktet në rajone të ndryshme të botës kanë dëshmuar se stabiliteti nuk mund të merret më si i mirëqenë.
“Sot bota po përballet me sfida të shumta. Kjo përbën një realitet të ri për NATO-n dhe edhe Shqipëria po përgatitet për këtë realitet, duke forcuar kapacitetet konkrete ushtarake, si dhe duke rritur e modernizuar Forcat e Armatosura,” tha ai.
Sipas ministrit, samiti i Ankarasë shënoi kalimin e Aleancës “nga premtimi te përgjegjësia”, duke theksuar se NATO nuk po shndërrohet në një aleancë agresive, por në një aleancë më të përgatitur për të garantuar paqen.
“Diskutimi nuk është më sa para do të shpenzohen, por çfarë kapacitetesh do të ndërtohen me këto investime. Forcimi i NATO-s është në interesin e Shqipërisë,” deklaroi Nufi.
Në përfundim, ministri vlerësoi se, megjithëse Shqipëria është një vend i vogël për nga përmasat, kontributi i saj në NATO është në përputhje me pozicionin e saj gjeostrategjik dhe me përgjegjësitë që rrjedhin nga anëtarësimi në Aleancë.
