Safet Bajri, i njohur si një ndër individët më të fortë të Shkodrës dhe shpesh i lidhur me ngjarje kriminale në këtë qytet, ka kallëzuar në SPAK një person, të cilin e akuzon për keqpërdorimin e emrit të tij për të ushtruar presion dhe vendosur gjoba ndaj qytetarëve shkodranë.
Përmes avokatit të tij, Sokol Tahiraj, Bajri ka kallëzuar Zikjan Lela për kryerjen e disa veprave penale, si “Mashtrim”, “Vjedhje me armë”, “Falsifikim”, “Shtërngim përmes kanosjes ose dhunës për të marrë pasuri” dhe “Shpifje”, të kryera nga një grup kriminal të strukturuar.
Bajri pohon se në Shkodër, Zikjan Lela dhe disa persona të tjerë kanë përdorur emrin e tij për të kryer vjedhje të telefonave Iphone 12, duke përdorur armë për kërcënime dhe duke pretenduar se janë instruktuar nga ai vetë. Sipas tij, këto veprime kanë dëmtuar rëndë figurën dhe reputacionin e tij në qytet, ndaj ai kërkon që të kryhen hetime dhe të arrestohen personat përgjegjës.
Në kallëzimin e tij, Bajri thekson: “Jam njoftuar se disa individë, në bashkëpunim me njëri-tjetrin, kanë përdorur emrin tim për të kryer vjedhje dhe për të vendosur gjoba ndaj qytetarëve, duke i kërcënuar me armë dhe duke pretenduar se ia kam dhënë unë ato armë. Kjo është një ngjarje e rëndë për reputacionin tim, prandaj kërkoj që Zikjan Lela dhe bashkëpunëtorët e tij të hetohen dhe të arrestohen për këto vepra penale”.
