Sekretari i Përgjithshëm i NATO-s, Mark Rutte, ka njoftuar se katër ushtarë amerikanë, të cilët u zhdukën në Lituani gjatë stërvitjeve ushtarake, kanë humbur jetën.
Ushtria amerikane më vonë tha se një automjet i përdorur nga ushtarët ishte gjetur i zhytur në ujë, duke shtuar se kërkimi për trupat e zhdukur vazhdon.
Ushtria e Lituanisë tha se po kërkonin katër ushtarë amerikanë dhe një automjet që ishte zhdukur pasditen e së martës.
Një deklaratë nga zyra e marrëdhënieve publike të ushtrisë amerikane për Evropën dhe Afrikën në Wiesbaden, Gjermani, tha se ushtarët po kryenin stërvitje taktike të planifikuar në atë kohë.
Transmetuesi publik lituanez LRT raportoi se katër ushtarë amerikanë dhe një automjet u raportuan të zhdukur të martën pasdite gjatë një stërvitje në terrenin e stërvitjes General Silvestras Žukauskas në Pabradė, një qytet që ndodhet më pak se 10 km (6 milje) nga kufiri me Bjellorusinë.
Vendet baltike të Lituanisë, Letonisë dhe Estonisë janë të gjitha anëtarë të NATO-s dhe shpesh kanë pasur lidhje të ftohta me Rusinë, një aleat kyç i Bjellorusisë, që nga shpallja e pavarësisë nga Bashkimi Sovjetik në vitin 1990.
Ndërkohë arrëdhëniet u përkeqësuan më tej pas pushtimit të plotë të Ukrainës nga Rusia në vitin 2022 dhe presidenti lituanez, Gitanas Nauseda, ka qenë një nga mbështetësit më të hapur të Ukrainës në luftën e saj kundër forcave të presidentit rus, Vladimir Putin.
