Rumania ka dëbuar një diplomat rus dhe e ka shpallur atë persona non grata, pas një serie shkeljesh të hapësirës ajrore rumune nga dronë rusë gjatë sulmeve të Moskës ndaj Ukrainës. Ministria e Jashtme rumune njoftoi se ambasadori rus u thirr për të marrë notën zyrtare të protestës, ndërsa diplomatit të dëbuar i janë dhënë pesë ditë kohë për t’u larguar nga vendi.
Vendimi vjen pasi avionët luftarakë F-16 të Rumanisë rrëzuan tre dronë rusë të tipit Shahed, të cilët hynë në hapësirën ajrore të vendit në tre ditë radhazi. Presidenti Nicușor Dan i cilësoi shkeljet si “të papranueshme dhe të patolerueshme”, duke theksuar se ato përbëjnë shkelje të hapësirës ajrore të një vendi anëtar të NATO-s dhe Bashkimit Evropian.
Ambasada ruse në Bukuresht hodhi poshtë akuzat, duke i quajtur ato të pabazuara dhe duke deklaruar se Rusia nuk ka drejtuar dronë ndaj territorit rumun. Moska paralajmëroi gjithashtu se do t’i përgjigjet vendimit të autoriteteve rumune me masa reciproke.
Incidentet ndodhën në sfondin e intensifikimit të sulmeve ruse ndaj porteve ukrainase në Danub, pranë kufirit me Rumaninë, duke rritur shqetësimet për sigurinë në krahun lindor të NATO-s.
