Të paktën 7 njerëz vdiqën dhe 10 të tjerë u plagosën për shkak të një rrëmuje në një festival hindu në Indinë veriore, ndërsa miliona njerëz u mblodhën për t’u larë në një nga vendet më të shenjta në bashkimin e tre lumenjve, Ganga, Yamuna dhe Saraswati mitik.
Një dëshmitar tha për Reuters se pa disa trupa të pajetë teksa ndiqte dhjetëra ambulanca që nxitonin drejt bregut të lumit ku ndodhi incidenti.
“Më shumë se shtatë persona janë vrarë në rrëmujë dhe 10 të tjerë janë plagosur”, tha një zyrtar.
Festivali Maha Kumbh, i cili mbahet çdo 12 vjet, filloi më 13 janar dhe është tubimi më i madh fetar në botë.
Organizatorët kishin parashikuar se më shumë se 400 milionë njerëz do të merrnin pjesë në vendin e pelegrinazhit gjatë gjashtë javëve të ardhshme.
