Conor McGregor më në fund i ka dhënë fund spekulimeve për të ardhmen e tij, duke konfirmuar datën e rikthimit në UFC.
Ish-kampioni i UFC-së në dy kategori peshe njoftoi zyrtarisht se do të rikthehet në Oktagon në eventin madhor UFC 330. Sipas deklaratës së tij, përballja është planifikuar të zhvillohet më 11 korrik 2026, në arenën legjendare të Las Vegasit.
Me stilin e tij karakteristik dhe plot vetëbesim, irlandezi iu drejtua tifozëve përmes Instagramit, duke konfirmuar se zërat e fundit për rikthimin e tij ishin të vërtetë.
“Thashethemet janë të vërteta! Po rikthehem për ta shpëtuar edhe një herë këtë biznes! Telefonojeni gjyshen tuaj dhe tregojini: ‘Gjyshe, ia dolëm!’”, deklaroi McGregor me emocion.
Ai gjithashtu u bëri thirrje tifozëve të blejnë transmetimin pay-per-view, duke shtuar edhe frazën e tij të njohur:
“Më paguani. Dreqi ta hajë, thjesht më paguani.”
McGregor nuk e fshehu aspak vetëbesimin, teksa e cilësoi duelin e ardhshëm si “punë e lehtë”. Në mesazhin e tij, ai la të kuptohet gjithashtu se ka plane edhe jashtë Oktagonit, duke përmendur kazino dhe një bashkëpunim me gjigantin mediatik Paramount.
Në fund, irlandezi e mbylli deklaratën me fjalët:
“Për jetën dhe përjetësinë – është McGregor! Mac ju do të gjithëve.”
Kështu, Conor McGregor tregoi qartë se karizma, ambicia dhe besimi i tij nuk janë zbehur aspak, pavarësisht mungesës së gjatë nga sporti.
