Forcat zjarrfikëse të Fierit, Patosit dhe Roskovecit, së bashku me punonjës të pyjores dhe banorë të zonës, janë angazhuar në një operacion të përbashkët për shuarjen e flakëve që kanë përfshirë masivin pyjor të Darëzezës. Zjarri i fuqishëm që shpërtheu dje u shua në orët e para të mëngjesit, por në mesditë vatrat u riaktivizuan dhe nisën të përhapeshin me shpejtësi në një sipërfaqe të gjerë.
Terreni i vështirë me rërë ka penguar ndërhyrjen e mjeteve zjarrfikëse, duke detyruar forcat në terren të përdorin mjete rrethanore. Bashkia Fier ka vënë në dispozicion edhe një traktor me zinxhir për hapjen e korridoreve që lehtësojnë ndërhyrjen.
Sipas Ministrisë së Mbrojtjes, në vendngjarje ndodhen 7 automjete zjarrfikëse me 40 efektivë të MZSH-së, një buldozer dhe një fadromë. Megjithatë, për shkak të terrenit të vështirë dhe përmasave të mëdha që ka marrë zjarri, situata në ekonominë pyjore të Darëzezës mbetet ende jashtë kontrollit.
