Futbolli botëror mund të jetë përpara një ndryshimi historik. FIFA po punon për një protokoll të ri që do t’u lejojë kampionateve kombëtare të zhvillojnë një ndeshje në sezon jashtë vendit të tyre.
Sipas raportimeve, çdo klub do të ketë mundësi të luajë një ndeshje kampionati jashtë shtetit, me qëllimin për ta çuar futbollin në një nivel edhe më global dhe për t’u dhënë tifozëve në vende të ndryshme mundësinë të ndjekin nga afër ndeshje të ligave më të mëdha.
Megjithatë, zbatimi i kësaj ideje do të kërkojë një proces të gjatë miratimi. Çdo kërkesë duhet të aprovohet nga federatat kombëtare të klubeve pjesëmarrëse, konfederatat përkatëse dhe autoritetet e futbollit në vendin pritës, përpara se vendimi final të merret nga FIFA.
Ky rregull i ri synon të shmangë problemet e mëparshme, si rastet e Barcelona-Villarreal apo Milan-Como, kur tentativat për të organizuar ndeshje jashtë vendit dështuan për shkak të mungesës së rregullave të qarta.
FIFA pritet ta miratojë dhe ta nisë këtë protokoll në fillim të sezonit të ardhshëm, ndërsa detajet përfundimtare do të diskutohen në mbledhjen e ardhshme të grupit të punës.
