Më shumë se 1,644 persona kanë humbur jetën në Mianmar, ndërsa 3,408 të tjerë janë plagosur pas tërmetit shkatërrues të një dite më parë.
Pjesa më e madhe e viktimave janë në qytetin e dytë më të madh të Mianmarit, Mandalay, zona më afër epiqendrës. Ndërsa Naypyidaw ka qenë i dyti më i goditur nga tronditja, me 94 të vdekur. Ekipet e shpëtimit, bashkë me qytetarët, janë duke kërkuar nën rrënoja për gjetjen e të mbijetuarve.
Sakaq, në Bangkok të Tajlandës, operacionet e kërkimit janë duke vazhduar pasi një ndërtesë e papërfunduar u shemb. Rreth 100 punëtorë rezultojnë të zhdukur, ndërsa 6 të tjerë humbën jetën, sipas zyrtarëve të qeverisë lokale.
Po ashtu, ekipet bëjnë me dije se në rrënojat e ndërtesës së shembur janë zbuluar të paktën 15 të mbijetuar, por ata janë shumë thellë dhe specialistëve do t’u duhet të përdorin makineri të rënda për të hequr sa më shpejt pjesët e ndërtesës së shembur.
Aeroporti ndërkombëtar ka anuluar fluturimet deri në njoftimin e mëtejshëm. Urat kryesore, rrugët, universitetet, hotelet, vendet historike dhe fetare, si dhe ndërtesat e shërbimeve publike janë dëmtuar ose shkatërruar plotësisht. Po ashtu, shërbimet e energjisë elektrike dhe të ujit janë ndërprerë.
Një mungesë e madhe e furnizimeve mjekësore po pengon përpjekjet për të shpëtuar të plagosurit.
Tërmeti katastrofik me magnitudë 7.7 ballë goditi vendin pasditen e së premtes, ndërsa u pasua nga një pasgoditje me magnitudë 6.7 ballë.
