Mes ndryshimit të brezave, të rinjve, frymës së talenteve dhe produktit të kampionatit, Kosova po ndjen “erën e ndryshimit” edhe pse kapitani i anijes, ose më saktë, ai që ka qenë që në fillim me gola dhe rol vendimtar është një emër: Vedat Muriqi!
30-vjeçari tregoi edhe njëherë pse ai është thelbësor për skuadrën, duke shënuar të tre golat në fitoren 3-1 ndaj Islandës në Murcia të Spanjës. Kjo fitore i siguroi Kosovës vendin në Ligën B të Ligës së Kombeve, një arritje historike për “Dardanët”.
Kjo ishte hera e parë që Muriqi përfundoi një ndeshje me Kosovën me tre gola të shënuar. Megjithatë, rekordi i tij personal mbetet katër gola, të shënuar ndaj San Marinos në një ndeshje miqësore më 1 qershor 2021, kur Kosova fitoi 4-1.
Muriqi ka treguar qëndrueshmëri në shënimin e golave, duke shënuar dy herë ndaj Irlandës së Veriut, Qipros dhe Zvicrës. Me 31 gola në 60 ndeshje, Muriqi është golashënuesi më i mirë në historinë e Kosovës, duke lënë prapa shumë emra të njohur të rajonit.
Ai është larg përpara të tjerëve, pasi i dyti në listë, Milot Rashica, me 12 gola. Lojtarë të tjerë si Arbër Zeneli, Amir Rrahmani, Edon Zhegrova dhe Elbasan Rashani kanë më pak se dhjetë gola secili.
Muriqi shënoi golin e parë për Kosovën më 13 nëntor 2017, në një ndeshje miqësore kundër Letonisë që u fitua 4-3. Që nga ajo ditë, ai ka shënuar të paktën dy gola çdo vit, ndërsa vitin 2021 duke qenë më i suksesshmi me tetë gola në 11 ndeshje.
Me formën e tij aktuale, Muriqi pritet të mbetet sulmuesi kryesor i Kosovës për shumë vite të ardhshme. Ai do të jetë figura kryesore në kualifikimet për Kupën e Botës 2026 dhe ndoshta edhe në ciklet pasuese.
Pa dyshim, Muriqi do të vazhdojë të jetë shtylla e sulmit të Kosovës dhe një burim frymëzimi për brezat e ardhshëm të lojtarëve.
