Instituti i Shëndetit Publik i Maqedonisë së Veriut ka konfirmuar sot dy rastet e para me linë e majmunëve në vend.
Të dy pacientët janë testuar pas rekomandimit të Klinikës së Sëmundjeve të Lëkurës. Përveç testimit për linë e majmunëve, janë kryer edhe analiza për HIV, sifiliz dhe herpes. Diagnostikimi është bërë përmes tre metodave të ndryshme laboratorike, të cilat kanë konfirmuar infeksionin.
Menjëherë pas marrjes së rezultateve, janë ndërmarrë masat përkatëse dhe janë informuar institucionet përgjegjëse, përfshirë Ministrinë e Shëndetësisë, Klinikën e Sëmundjeve të Lëkurës dhe Klinikën e Sëmundjeve Infektive.
Epidemiologët e Institutit kanë filluar hetimin epidemiologjik të rasteve për të mbledhur të dhëna që do të ndihmojnë në mbrojtjen dhe kontrollin e mëtejshëm të sëmundjes. Pacientët janë udhëzuar të paraqiten në Klinikën e Sëmundjeve Infektive për ndjekje dhe trajtim të mëtejshëm, sipas burimeve mediatike në vend.
Instituti thekson se nuk ka arsye për panik, pasi të gjitha strukturat po veprojnë me efikasitet dhe profesionalizëm për të frenuar përhapjen e virusit.
