Biznesmeni italian, Francesco Becchetti ka nisur një tjetër betejë ligjore me shtetin shqiptar, pasi fitoi arbitrazhin në shumën prej 110 milion euro në lidhje me mbylljen e paligjshme të televizionit Agon Channel.
Këtë herë, Becchetti ka ngritur një padi ndaj Shqipërisë në lidhje me refuzimin për të paguar 110 milionë eurot e gjobës së vendosur nga “Arbitrazhi” në vitin 2021, si dhe për fushatën denigruese të Qeverisë shqiptare ndaj tij.
Lajmi është bërë publike nga “Global Arbitration Review“, e cila raporton se Francesco Becchetti dhe bashkëpunëtorët e tij që investuan në Shqipëri pretendojnë dëmshpërblim për refuzimin e Shqipërisë për të paguar gjobën e majme të vendosur nga arbitrazhi i Bankës Botërore, por edhe me pretendimet e fushatës së vazhdueshme të persekutimit’, sipas tyre nga Shqipëria.
Në dosjen e kallëzimit përfshihen deklaratat e zyrtarëve të lartë të Qeverisë shqiptare, përfshirë këtu edhe të Kryeministrit Edi Rama, që ka deklaruar se Francesco Becchetti nuk ka marrë dhe nuk do të marrë asnjë qindarkë nga shteti shqiptar
Ndërkohë, pretendimet për persektutim të vazhdueshëm janë ngritur me dosjen e drejtësisë shqiptare, që ka dënuar Becchettin me 17 vite burg për skemë mashtrimi me tatimin mbi vlerën e shtuar, evazion fiskal dhe fshehje pasurie.
Është e paqartë se në cilën gjykatë janë ngritur pretendimet e reja të Francesco Becchetti-t, por konventa e ICSID, gjykatës së arbitrazhit që gjobiti Shqipërinë parashikon në nenin 54 të saj se çdo pretendim për refuzim të zbatimit të vendimeve të kësaj gjykate mund të ankimohen në gjykatat e vendeve anëtare të kësaj konvente, që janë 163 shtete dhe entitete.
Kujtojmë se nga faktet dhe provat e vëna në dispozicion, ICSID ka konstatuar se si rezultat i veprimeve të paligjshme të zyrtarëve të lartë shtetërorë, ku përfshihen Edi Rama, Erion Veliaj dhe Ëngjëll Agaci, në bashkëpunim me zyrtarë të tjerë të një rangu më të ulët si Enkelejd Joti, Skerdi Drenova apo Gentian Sala, sipërmarrjet e biznesmenit italian Becchetti janë shkatërruar plotësisht.
Pak kohë më parë, Eurocontrol njoftoi zyrtarisht Qeverinë shqiptare se përmbaruesi i Becchettit ka ekzekutuar vendimin e arbitrazhit, duke marrë të gjitha paratë e hapësirës ajrore të Shqipërisë, të cilat mbaheshin të bllokuara në llogarinë e Eurocontrol, që prej dhjetorit të vitit 2020.
Në seancën plenare të 3 Dhjetorit në Kuvend, Partia Demokratike kishte kërkuar një interpelancë urgjente me Edi Ramën në lidhje me këtë çështje dhe heshtjen e Qeverisë dhe “Albcontrol”, por kryetarja e Kuvendit, Elisa Spiropali u përgjigj se kryeministri e kishte axhendën shumë të ngjeshur dhe e kishte të pamundur t’i përgjigjej pyetjeve atë ditë.
Më pas, Edi Rama reagoi vetë në rrjetet dhe deklaroi se do t’i reufoznte çdo interpelancë Gazment Bardhi, derisa SPAK të shprehej për akuzat për vëllain e tij, Olsi Rama, në lidhje me pretendimet se ka qenë i lidhur me grupin e laboratorit të kokainës në Xibrakë.
