Real Madridi është shumë pranë mbylljes së transferimit të Yan Diomandes nga RB Leipzig. Marrëveshja me lojtarin është arritur prej ditësh, ndërsa mes dy klubeve kanë mbetur vetëm disa detaje të vogla.
Operacioni pritet të mbyllet për një shumë mes 115 dhe 120 milionë eurove. Paga dhe kohëzgjatja e kontratës janë përcaktuar, ndërsa tani po punohet për shkëmbimin e dokumenteve dhe firmat përfundimtare.
Marrëdhënia mes Real Madridit dhe përfaqësuesve të Diomandes ka qenë e shpejtë dhe pozitive. Talenti nga Bregu i Fildishtë përfaqësohet nga e njëjta agjenci që menaxhon edhe Vinícius Júnior, çka ka lehtësuar komunikimin mes palëve.
Zyrtarizimi mund të vijë që këtë të hënë. Nëse marrëveshja mbyllet në kohë, Diomande nuk do të bashkohet me fazën përgatitore të RB Leipzig dhe do të nisë menjëherë aventurën e tij të re në Madrid.
Ai pritet të bëhet afrimi i pestë i Real Madridit gjatë kësaj vere dhe një nga goditjet më të mëdha të merkatos.
