Real Madrid po përgatit një tjetër goditje në merkato. Pas rikthimit të José Mourinho në stol dhe lëvizjeve për Konaté e Dumfries, klubi madrilen është shumë pranë marrëveshjes për Bernardo Silva.
Sipas raportimeve nga Spanja, mesfushori portugez ka kryer tashmë vizitat mjekësore ndërsa ndodhet i grumbulluar me kombëtaren e Portugalisë. Marrëveshja mes palëve është afër finalizimit dhe, nëse gjithçka shkon sipas planit, Bernardo Silva do të firmosë për dy sezonet e ardhshme me Real Madrid.
Drejtuesit madrilenë kanë pranuar kushtet e kërkuara nga lojtari, ndërsa Mourinho e sheh 31-vjeçarin si një përforcim të rëndësishëm për skuadrën e tij. Trajneri portugez kërkon karakterin, eksperiencën dhe mentalitetin fitues të Bernardo Silva në dhomën e zhveshjes.
Pasi vendosi të largohej nga Manchester City, Bernardo Silva dhe agjenti i tij, Jorge Mendes, nisën të kërkonin destinacionin e ri. Real Madrid ishte një nga klubet e para që iu ofrua mundësia për transferimin e tij.
Emri i portugezit u lidh edhe me Barcelona dhe Atletico Madrid, por asnjë prej tyre nuk arriti të siguronte një marrëveshje konkrete. Situata ndryshoi kur Bernardo mësoi se Real Madrid ishte gati të hynte seriozisht në garë.
Tani gjithçka duket në rrugën e duhur dhe në ditët në vijim emri i Bernardo Silva mund t’i shtohet zyrtarisht skuadrës së re të Mourinhos në Madrid.
