Barcelona njoftoi ditën e sotme se Raphinha do të mungojë në ndeshjen e sotme të LaLiga-s kundër Real Sociedad në “Reale Arena” (21:00). Sulmuesi brazilian nuk është përfshirë në skuadër, pasi ka pësuar një goditje në kofshën e djathtë, siç konfirmoi klubi në komunikatën zyrtare.
Trajneri Hansi Flick e kishte lënë të hapur deri në fund pjesëmarrjen e Raphinha-s, duke shpjeguar në konferencë se lojtari po ndiente shqetësim dhe stafi do të vendoste nëse do ta aktivizonte apo do ta pushonte si masë paraprake. Në fund, Barça vendosi të mos rrezikojë, sidomos duke pasur parasysh se në mesjavë e pret një ndeshje e rëndësishme në Champions League.
Raphinha luajti në finalen e fundit të Superkupës me disa shqetësime, por arriti të aktivizohej dhe të kontribuonte në fitoren e Barcelonës. Megjithatë, problemet fizike vazhduan dhe, pasi nuk u stërvit me grupin të shtunën, klubi vendosi që ai të mbetet në Barcelonë. Për ta zëvendësuar në krahun e majtë, Flick mund të zgjedhë Marcus Rashford ose Dani Olmo, të dy kandidatë për titullarë në San Sebastián.
Në listën e lojtarëve të grumbulluar, përveç mungesës së Raphinha-s, risi është rikthimi i Frenkie de Jong, i cili kthehet pas pezullimit prej një ndeshjeje. Flick i ka pothuajse të gjithë lojtarët në dispozicion, përjashto të dëmtuarit Gavi dhe Christensen, si edhe një lojtar të akademisë që pritet të mbyllë transferimin te PSG. Këtë herë, trajneri i Barçës vendosi të mos thërrasë lojtarë nga ekipi rezervë.
Barcelona e pamposhtur në 2026
Barcelona, kryesuese e LaLiga-s, synon të zgjasë serinë e shkëlqyer prej 11 fitoresh radhazi. Humbja e fundit e “Blaugrana” ka ardhur më 25 nëntor kundër Chelsea-t dhe që nga ajo ditë skuadra nuk ka njohur humbje. Me Real Madridin që e ndjek nga afër, ekipi i Flick ka nevojë për tri pikët për të ruajtur avantazhin prej katër pikësh në krye të tabelës.
