Qeveria shqiptare ka miratuar marrëveshjen për aderimin në Bordin e Paqes për Gazën, e cila pritet të ratifikohet nga Kuvendi nesër. Sipas vendimit të Këshillit të Ministrave, Shqipëria do të përfaqësohet nga Kryeministri Edi Rama dhe do të bëhet anëtare e Kartës themeluese të Bordit.
Bordi i Paqes do të krijohet si një organizatë ndërkombëtare me personalitet juridik, e cila do të ketë si mision promovimin e stabilitetit dhe sigurimin e paqes në territore të prekura nga konflikti. Aktivitetet e saj do të zhvillohen në përputhje me ligjet ndërkombëtare. Anëtarësimi i Shqipërisë në këtë Bord shikohet si një hap të rëndësishëm për politikën e jashtme të vendit, duke i dhënë statusin e anëtarit themelues dhe mundësinë për të ndikuar në vendimmarrje.
Qeveria argumenton se ky status do të rrisë profilin ndërkombëtar të Shqipërisë, duke e pozicionuar si një faktor stabiliteti në rajon, veçanërisht në zgjidhjen e konflikteve të vazhdueshme, përfshirë ato në Lindjen e Mesme. Marrëveshja për përfshirjen e Shqipërisë në Bordin e Paqes konsiderohet gjithashtu si një konfirmim i partneritetit strategjik me Shtetet e Bashkuara.
Bordi do të drejtohet nga një Kryetar dhe do të ketë dy struktura kryesore: Bordin e Shteteve Anëtare dhe Bordin Ekzekutiv. Vendimet do të merren me shumicë dhe do të duhet të miratohen nga Kryetari, i cili ka resurset e veta për ndalimin e vendimeve. Anëtarësimi në Bordi është me ftesë dhe ka mandat trevjeçar, me përjashtim për ata që kontribuojnë mbi 1 miliard dollarë brenda vitit të parë.
Financimi i Bordit do të bëhet përmes kontributeve vullnetare dhe organizata do të gëzojë privilegje të caktuara. Megjithatë, aktualisht marrëveshja nuk do të sjellë kosto shtesë për buxhetin e shtetit, përveç kontributeve që do të jenë të parashikuara në buxhetet e ardhshme.
Për zbatimin e marrëveshjes do të jenë të angazhuara disa ministri, përfshirë atë për Evropën dhe Punët e Jashtme, ndërsa prapa iniciativës qëndron edhe një rezolutë e Këshillit të Sigurimit të OKB-së.
