Riorganizimi administrativ i Qendrës së Mjekësisë Familjare (ish-Qendra Shëndetësore Nr. 10) në Tiranë nuk do të sjellë largim të mjekëve specialistë apo reduktim të shërbimeve për qytetarët.
Drejtoresha e kësaj qendre, Silvana Tako, ka sqaruar se ndryshimi lidhet vetëm me varësinë administrative, pasi mjekët specialistë do të kalojnë nën administrimin e Qendrës Shëndetësore të Specialiteteve Nr. 1 në Tiranë, ndërsa do të vijojnë të punojnë në të njëjtat ambiente dhe me të njëjtën popullatë.
Sipas saj, qytetarët do të marrin shërbimin nga të njëjtët mjekë, në të njëjtin vend dhe me të njëjtin orar si më parë.
“Qendra jonë e mjekësisë familjare është modeli i parë sipas udhëzimeve të OBSH-së dhe e para në vend ku mjekët e familjes ndjekin grupmoshat nga zero deri në 100 vjeç. Në këtë godinë do të vazhdojnë të ofrojnë shërbimin mjekët specialistë, si kardiologu, kirurgu, obstetër-gjinekologu dhe pediatri”, u shpreh Tako.
Ajo theksoi se ndryshimi administrativ është bërë për një organizim më të mirë të shërbimeve dhe për të forcuar më tej rolin e mjekësisë së familjes.
“Qytetarët nuk duhet të shqetësohen, pasi nuk ndryshon asgjë në marrjen e shërbimit. Mjekët janë në të njëjtin pozicion pune, ndjekin të njëjtët pacientë dhe ofrojnë kujdesin shëndetësor në të njëjtin vend”, deklaroi drejtoresha e qendrës.
Sipas saj, organizimi i ri synon rritjen e cilësisë së shërbimit dhe një menaxhim më efikas të mjekëve specialistë sipas zonave të mbulimit.
