Tridhjetë e tetë nga 42 skuadrat e dy kategorive më të larta të futbollit spanjoll do të zbresin në fushë këtë fundjavë me fanella retro, në një nismë që synon të festojë identitetin kulturor të secilit klub.
Fanellat do të frymëzohen nga modelet ikonike të së kaluarës dhe do të jenë një homazh për historinë e klubeve dhe traditat e tifozëve të tyre. Vetëm Barcelona, Rayo Vallecano, Getafe dhe Real Madrid nuk do të marrin pjesë në këtë ditë speciale.
Sipas Marca, Barcelona, Rayo Vallecano dhe Getafe nuk do të veshin fanella të veçanta për arsye të ndryshme logjistike, por gjithsesi janë pjesë e fushatës. Ndërsa Real Madrid nuk do të marrë pjesë fare në këtë iniciativë.
Edhe arbitrat do të veshin një komplet të posaçëm, ndërsa grafikat e transmetimeve televizive do të kenë një stil që rikthen dekadat e kaluara. Po ashtu, gjatë gjithë ndeshjeve të fundjavës do të përdoret edhe një top me dizajn vintage.
Fanellat u prezantuan më 19 mars në Madrid Fashion Week, në kuadër të një bashkëpunimi mes futbollit dhe modës. La Liga bëhet kështu kampionati i parë mes pesë ligave më të mëdha të Europës që organizon një fushatë të koordinuar me fanella retro, ndonëse iniciativa të ngjashme janë parë më parë në sporte të tjera, si rugby dhe futbolli australian.
Drejtori i La Liga-s, Jaime Blanco, e përshkroi këtë si një mënyrë unike për të sjellë historinë dhe traditat e klubeve në të tashmen. Sipas tij, kjo nismë ndihmon në forcimin e trashëgimisë emocionale që i lidh klubet me tifozët, ndërsa prezantimi në javën më të rëndësishme të modës në Spanjë i jep futbollit një vend edhe më të fortë në bisedën kulturore dhe krijuese.
Nostalgjia në futboll nuk është një fenomen i ri. Këtë sezon, Juventus prezantoi fanellën e katërt të frymëzuar nga sezoni 1996-97, Liverpool nxori një koleksion retro me fanella që rikthejnë kujtime nga vitet ’60 dhe nga triumfi i vitit 2005 në Stamboll, ndërsa Arsenal solli një version të ri të fanellës së famshme “banana” të viteve 1991-1992. Edhe markat e mëdha si Nike dhe Adidas po rikthejnë elementë klasikë nga vitet ’90 në koleksionet e tyre të fundit.
Rritja e interesit për fanellat retro është kthyer në një biznes shumë fitimprurës. Sipas raportimeve, vetëm kompania Classic Football Shirts operon tashmë në një treg që i afrohet 40 milionë paundëve. Sipas Jordan Clarke, themelues i platformës Footballerfits, nostalgjia nuk është thjesht një mani e tifozëve të futbollit, por një ndjenjë më e gjerë shoqërore. Ai thotë se shumë njerëz shohin me mall periudha më të thjeshta të jetës së tyre dhe futbolli thjesht pasqyron këtë ndjesi.
Clarke mendon gjithashtu se futbolli modern është bërë më “robotik”, me më pak vetëshprehje në fushë, më pak personalitet dhe më shumë kontroll taktik nga trajnerët. Për këtë arsye, shumë lojtarë kërkojnë mënyra të tjera për të shprehur veten, përmes modës, muzikës apo kulturës në përgjithësi.
Futbollistët janë bërë tashmë pjesë e rregullt e javëve të modës, ndërsa klubet po e përdorin gjithnjë e më shumë lidhjen mes futbollit dhe kulturës si mënyrë për të zgjeruar bazën e tifozëve. Sipas Clarke, ekipe si Arsenal dhe Paris Saint-Germain po tërheqin edhe njerëz që nuk janë domosdoshmërisht të fiksuar pas futbollit, por që lidhen me elementët e modës dhe muzikës që klubet përfaqësojnë. Dhe pikërisht kjo e bën futbollin më “cool” dhe më tërheqës për një audiencë më të gjerë.
