Pesë mjete lundruese janë ndaluar nga Policia Kufitare e Sarandës, pasi gjatë kontrolleve janë konstatuar pa dokumentacionin e detyrueshëm.
Bëhet fjalë për një skaf dhe katër jet-ski, të cilat janë konstatuar në shkelje të rregullave gjatë kontrolleve të kryera nga shërbimet kufitare.
Në listën e mjeteve të ndaluara janë skafi “Deda”, në pronësi të M. D., si dhe jet-skitë “Kania 2021”, në pronësi të Dh. L., “Renaldo”, në pronësi të Xh. M., dhe “Ksamili 5” e “Ksamili 6”, në pronësi të E. M.
Mësohet se ndaj secilit prej pronarëve është vendosur gjobë në masën 10 mijë lekë, në bazë të legjislacionit në fuqi.
Kontrollet nga Policia Kufitare vijojnë në zonat bregdetare, me fokus respektimin e rregullave të sigurisë dhe dokumentacionit nga drejtuesit e mjeteve lundruese.
