Pamje të tmerrshme dhe dëshmi rrëqethëse kanë dalë në dritë pas vrasjes brutale të një 23-vjeçareje nga Ukraina, Irina Zarutska, e cila u ther me thikë në qafë nga një 35-vjeçar brenda një treni në Charlotte, SHBA.
Sipas mediave amerikane, thirrjet e para në numrin e emergjencës pasqyrojnë panikun dhe tronditjen e pasagjerëve që u gjendën dëshmitarë të ngjarjes së rëndë. “Një burrë sapo e goditi me thikë këtë grua, pa asnjë arsye“, dëgjohet të thotë një burrë i panikuar, i cili kishte telefonuar menjëherë autoritetet.
Autori i dyshuar, Dekarlos Brown, kishte një histori të mëparshme dhune dhe sulmesh me armë të ftohta. Viktima, e cila kishte emigruar në SHBA në vitin 2022 për të shpëtuar nga lufta në Ukrainë, nuk ka reaguar pas goditjes, ndërsa dëshmitarët janë përpjekur t’i ndalojnë gjakderdhjen deri në mbërritjen e ndihmës mjekësore.
“Ju lutem, nxitoni, ajo po derdh shumë gjak!”, dëgjohet duke thënë një tjetër dëshmitar, i cili në gjendje të rënduar emocionale mezi arrinte t’i përgjigjej pyetjeve të operatorit.
Një grua tjetër raportoi: “Një grua është në tokë, ka shumë gjak. Mendoj se ka vdekur.” Ndërkohë, një pasagjer tjetër tha: “Një vajzë u ther me thikë në tren. Mendoj se ka vdekur… autori ndodhet ende këtu, në platformë.”
Autoritetet amerikane kanë arrestuar autorin e dyshuar, ndërsa hetimet për ngjarjen janë në zhvillim. Vrasja brutale e Irina Zarutskës ka shkaktuar zemërim dhe tronditje në opinionin publik amerikan, veçanërisht për shkak të faktit që viktima ishte një refugjate lufte që kishte kërkuar siguri në SHBA.
