Politika britanike është në zi pas vdekjes së papritur të Alex Salmond, ish-kryeministrit të Skocisë, i cili ndëroi jetë sot në moshën 69-vjeçare nga një atak kardiak gjatë një eventi në Maqedoninë e Veriut.
Salmond, një figurë e njohur për angazhimin e tij pro-pavarësisë, po merrte pjesë në Forumin Kulturor Diplomatik në Ohër, ku kishte mbajtur një fjalim të fuqishëm. Në një foto të fundit, ai shihet i buzëqeshur pranë kryetares së partisë së tij, Tasmina Ahmed-Sheikh, duke reflektuar mbi angazhimin e tij për Skocinë.
Pjesë e bisedave të tij të fundit ishte komenti në rrjetet sociale, ku ai theksonte: “Skocia është një shtet, jo një konte e Britanisë”.
Reagimet për humbjen e tij ishin të shumta. Kryeministri britanik Keir Starmer e përshkroi Salmondin si “një figurë monumentale e politikës së Skocisë dhe Britanisë”, duke shtuar se ai la pas një trashëgimi të madhe. Edhe kryeministri aktual i Skocisë, John Swinney, shprehu trishtim dhe habi për këtë ngjarje të papritur.
Salmond kishte udhëhequr Partinë Kombëtare Skoceze nga viti 1990 deri në 2000, dhe më pas përsëri nga 2004 deri në 2014. Pas akuzave për ngacmim seksual, nga të cilat u shpall i pafajshëm, ai u detyrua të hiqte dorë nga politika aktive. Ai konsiderohej si mentori i lideres së mëparshme të Skocisë, Nicola Sturgeon.
Arsyet e vdekjes së tij ende nuk janë bërë të ditura, por humbja e tij do të ndihet thellë në politikën skoceze dhe britanike.
