Andrea Pirlo mund të jetë surpriza e madhe për stolin e Italisë. Ish-mesfushori i madh i kombëtares dhe ish-trajneri i Juventusit po merret seriozisht në konsideratë nga Paolo Maldini dhe Leonardo për të nisur një cikël të ri te “Azzurrët”, me objektivin madhor Botërorin 2030.
Sipas raportimeve, Maldini, në rolin e drejtorit teknik të Italisë, dhe Leonardo, si krahu i tij i djathtë, e vlerësojnë shumë profilin e Pirlos. Për ta, ai përfaqëson disa nga cilësitë që duhet të ketë trajneri i ardhshëm i kombëtares: njohje të thellë të futbollit italian, ide, guxim dhe shpirt fitues.
Pirlo, tashmë 47 vjeç, nuk është më një trajner fillestar, por mbetet një emër i ri në krahasim me profilet e tjera që po diskutohen. Pas eksperiencave te Juventus, Karagumruk dhe Sampdoria, ai aktualisht po punon në Dubai, ndërsa emri i tij ka fituar terren në orët e fundit.
Në sfond mbetet ëndrra e madhe Pep Guardiola, për të cilin po vazhdojnë diskutimet, por edhe kandidaturat e njohura të Antonio Contes dhe Roberto Mancinit. Maldini dhe Leonardo pritet të bëjnë një vlerësim përfundimtar shumë shpejt, përpara se vendimi t’i kalojë presidentit të FIGC, Giovanni Malagò.
Ky i fundit foli për situatën dhe pranoi se zgjedhja e trajnerit nuk do të bëhet me nxitim.
“Pasi u zgjodh Maldini, u zgjodh edhe Leonardo. Tani vjen trajneri, që do të vijë sa më shpejt, por pa bërë hapa të gabuar. Ka aspekte që duhen ndarë me Maldinin dhe Leonardon, me të cilët do të kemi një takim më të detajuar në dy ditët e ardhshme”, u shpreh Malagò.
Ai foli edhe për mundësinë Guardiola, duke e lënë të hapur si ide, por duke theksuar se dëshirat duhet të përputhen me realitetin.
“Askush nuk mund të thotë se Pep nuk është një ide shumë e rëndësishme. Duhet parë nëse është personi apo profili i duhur, si dhe nëse do të ketë përputhshmëri”, tha presidenti i federatës italiane.
Italia është në kërkim të një drejtimi të ri dhe emri i Pirlos tashmë nuk është më thjesht një sugjerim, por një kandidaturë konkrete në tryezën e Maldinit dhe Leonardos.
