Kuvendi i Shqipërisë u përfshi në një tjetër përplasje të ashpër mes deputetëve, duke shkaktuar tensione dhe ndërprerje të seancës. Deputetja Ina Zhupa u përplas verbalisht me kreun e grupit të PS, Niko Peleshi, dhe deputetin socialist Erion Braçe.
Gjithçka nisi kur Erion Braçe, në nisje të seancës plenare, e quajti Zhupën “ruse”. Përgjigjja e Zhupës nuk vonoi, dhe ajo përdori fjalë të ashpra ndaj socialistit, duke e krahasuar me një personazh nga filmi “Kapedani”.
Ina Zhupa deklaroi:
“Në mungesë të dhënies së fjalës për replikë me zotin Xha Sulo alias Erion Braçe, dua të them se ke një problem me gjatësinë, por nuk ta zgjidh dot unë këtë problem. Unë nuk i dëgjoj nën ata 1.5 metra. Nuk e di kush ta jep të drejtën që të më quash ruse, sepse unë nuk ja jap vetes të drejtën të të quaj kone edhe pse të quajnë të gjithë.”
Ajo vazhdoi duke përdorur një shprehje ironike:
“Nga ana ime, nga unë vij, fëmijët i trajtojmë me respekt dhe kur futen në çështje të të mëdhenjve, ne kemi një shprehje dhe i themi: ‘O Erjon, t’u rrit boja, sa shumë m… të ha goja.’ E meriton plotësisht.”
Replikat nuk u ndalën aty, pasi kreu i grupit të PS, Niko Peleshi, ndërhyri duke kërkuar ndërprerjen e seancës derisa deputetja Zhupa të kërkonte falje. Por Zhupa iu drejtua Peleshit me një tjetër akuzë personale:
“Po ti, Niko, i thua gruas tënde ruse?”
Nga ana tjetër, Erion Braçe reagoi duke i kërkuar Zhupës “të mbajë gojën”, ndërsa tensionet u përshkallëzuan. Ai shtoi:
“Mbaje gojën, fytyrë e keqe. E di ç’të punoj!”
Debati shkaktoi ndërprerjen e seancës, ndërsa përplasjet verbale mes deputetëve mbeten ende temë diskutimi në opinionin publik.
