Një aksident tragjik në Itali i ka marrë jetën një 44-vjeçari shqiptar, Eduart Shaka, banues në Nervesa della Battaglia. Ngjarja ndodhi pas një përplasjeje ballore mes makinës së tij Fiat Punto dhe një Volkswagen Golf, që po lëvizte në korsinë e kundërt.
Mediat italiane raportojnë se Shaka u gjet nga policia disa metra larg automjetit të tij, duke sugjeruar se nuk kishte vendosur rripin e sigurimit në momentin e aksidentit. Ndërkohë, drejtuesi i Golfit, një 53-vjeçar nga Carbonera, ka pësuar vetëm lëndime të lehta dhe është dërguar për trajtim në spitalin e Trevisos.
Sipas hetimeve paraprake, makina e 53-vjeçarit kishte dalë në korsinë e kundërt për arsye ende të paqarta, duke shkaktuar përplasjen fatale. Autoritetet italiane po vijojnë hetimet për të zbardhur rrethanat e plota të aksidentit.
Eduart Shaka, i lindur në Durrës, kishte emigruar në Itali në vitin 2010 dhe jetonte atje me vajzën e tij. Kjo ngjarje ka lënë një boshllëk të madh në familjen e tij dhe komunitetin shqiptar në Itali.
