Shira të rrëmbyeshëm goditën rajonin Mokwa në shtetin Niger, në pjesën perëndimore të Nigerisë, mbrëmjen e së mërkurës, duke shkaktuar përmbytje të rënda që lanë pas vetes të paktën 25 viktima dhe shumë të zhdukur.
Sipas të dhënave nga Agjencia Shtetërore për Menaxhimin e Emergjencave (SEMA), rreth 50 banesa u përfshinë nga vërshimet, duke rrezikuar jetën e dhjetëra familjeve. Ekipet e emergjencës dhe vullnetarët arritën të shpëtojnë disa banorë, përfshirë një nënë me dy fëmijët e saj.
“Situata është jashtëzakonisht e rëndë. Operacionet e kërkim-shpëtimit vazhdojnë me shpresën për të gjetur të mbijetuar,” deklaroi një zyrtar lokal.
Shërbimi Meteorologjik i Nigerisë (NiMet) kishte paralajmëruar më herët për reshje intensive në 15 shtete, por dëmet në Mokwa rezultuan veçanërisht të rënda.
Ngjarja ndodh ndërsa Nigeria ende po përpiqet të rimëkëmbet nga përmbytjet katastrofike të vitit 2022, të cilat morën jetën e mbi 1,200 personave dhe detyruan mbi 1.2 milionë banorë të braktisin shtëpitë e tyre përmbytjet më të rënda në dekada.
