Një lajm i trishtë vjen nga familja e aktorit dhe regjisorit të njohur shqiptar, Naun Shundi, i cili po përballet me një situatë të rëndë shëndetësore në QSUT. Bashkëshortja e tij ka reaguar me një mesazh prekës në rrjetet sociale, ku ndan mirënjohjen për të gjithë ata që janë solidarizuar me ta në këto ditë të vështira.
Ajo falënderon miqtë, kolegët, artdashësit dhe çdo qytetar që ka kontribuar financiarisht për trajtimin e Shundit, duke e cilësuar ndihmën e tyre si burim force dhe kuraje në këtë betejë për jetën. “Çdo emër që ka kontribuar në llogaritë tona të hapura, që kjo ëndërr e keqe të mbetej vetëm një ëndërr, ka jo vetëm mirënjohjen, por mbi të gjitha, na ka falur lehtësi dhe kurajo”, shkruan ajo.
Megjithatë, ajo sjell edhe një lajm të hidhur për publikun: gjendja e aktorit ka marrë një kthesë të rëndë dhe aspak optimiste. Për këtë arsye, ajo kërkon ndalimin e çdo ndihme të mëtejshme financiare në faqet e hapura për këtë qëllim.
Postimi i plotë:
Në ditë të keqe, u shfaqën njerëz të mrekullueshëm, që na ndihmuan në këtë situatë të vështirë për shëndetin e aktorit regjisorit dramaturgut Naun Shundit. Ç’do emër që ka kontribuar në llogaritë tona të hapura, që kjo ëndërr e keqe, të mbetej vetëm një ëndërr, ka jo vetëm mirënjohjen, por mbi të gjitha, na ka falur lehtësi dhe kurajo për betejën me jetën.
Miq, dashamirës, koleg, artdashës. Mos kontribuoni më në këto faqe. Tashmë, fatkeqësisht, shëndeti i Shundit ka marrë një kthesë aspak optimale.
Mirënjohje dhe shëndet në familjet tuaja!
