Kryeministri Edi Rama ka vlerësuar nismën e ‘Pasqyrës së Çmimeve’, duke e cilësuar si një instrument pozitiv që po jep rezultatet e para. Në podcastin e tij ‘FLASIM’, Rama u shpreh se qytetarët tashmë kanë mundësi të krahasojnë çmimet mes pikave të ndryshme të shitjes dhe të orientohen drejt marketeve dhe rrjeteve të supermarketeve që ofrojnë alternativa më të leverdishme për blerjet e tyre.
Sipas Ramës, pasqyra digjitale krijon transparencë në treg, pasi u mundëson si konsumatorëve, ashtu edhe bizneseve, të informohen në kohë reale mbi çmimet dhe të krahasojnë ofertat me njëri-tjetrin. Ai theksoi se kjo nismë mund të ndikojë në rritjen e konkurrencës mes rrjeteve të supermarketeve, ndërsa bëri me dije se synimi është të merret edhe një vlerësim fillestar mbi efektin e uljes së TVSH-së dhe ndikimin e saj te konsumatorët.
“Ne sot nuk hyjmë në terren të panjohur, sepse kemi një instrument të ri aktiv, që është pasqyra digjitale e çmimeve, e cila po jep shenja pozitive. Gjendet e reflektuar në të gjitha pikat e shitjes që e kanë përqafuar këtë iniciativë. Qytetarët kanë mundësi të bëjnë krahasimet dhe të zgjedhin. Është e rëndësishme që rrjetet e supermarketeve të shohin në kohë reale njëri-tjetrin.”, u shpreh ai.










