Irani ka paralajmëruar për hakmarrje shkatërruese në rast se Shtetet e Bashkuara dhe Izraeli godasin objektiva civile në territorin e tij.
Sipas mediave shtetërore iraniane, një zëdhënës i Shtabit Qendror Khatam al-Anbiya, struktura më e lartë operative ushtarake e vendit, deklaroi se çdo sulm i përsëritur ndaj civilëve do të pasohet nga “operacione shumë më shkatërruese”.
Ky paralajmërim vjen në një moment tensioni të lartë, pasi presidenti i SHBA-së, Donald Trump, ka kërcënuar publikisht me sulme ndaj infrastrukturës kritike të Iranit, përfshirë termocentralet dhe urat, nëse Teherani nuk rihap Ngushticën e Hormuzit brenda një afati të caktuar.
Në një postim në rrjetet sociale, Trump përdori tone të forta dhe deklaroi se “e marta do të jetë dita e termocentraleve dhe urave në Iran”, duke paralajmëruar një ofensivë të mundshme. Fillimisht, ai kishte vendosur një afat 48-orësh që skadonte më 6 prill, por më pas e shtyu atë deri të martën në orën 20:00 sipas kohës lindore amerikane.
Presidenti amerikan ka ndryshuar disa herë afatet për rihapjen e Ngushticës së Hormuzit, një pikë strategjike kyçe për tregtinë globale të naftës. Në një intervistë për Fox News, ai u shpreh se ekziston një “mundësi e mirë” për arritjen e një marrëveshjeje, por paralajmëroi gjithashtu se mund të ndërmarrë masa ekstreme nëse negociatat dështojnë.
Ndërkohë, Trump njoftoi edhe shpëtimin e anëtarit të dytë të ekuipazhit të një avioni luftarak amerikan, i cili ishte rrëzuar mbi territorin iranian. Operacioni i shpëtimit, sipas tij, u realizua në territorin armiqësor dhe u paraqit si dëshmi e “epërsisë ajrore” të SHBA-së.
