Arsenal ka siguruar biletën për në finalen e Champions League, pasi mposhti Atlético Madrid me rezultatin 1-0 në “Emirates Stadium”.
Skuadra e Mikel Arteta i dha fund ëndrrës europiane të Atlético Madrid, që mbeti shumë pranë një tjetër finaleje, por nuk arriti të gjente rrugën e golit në Londër.
Goli vendimtar u shënua nga Bukayo Saka, i cili përfitoi nga një top i kthyer nga Jan Oblak dhe dërgoi Arsenal në finalen e madhe të Budapestit.
Për “Topçinjtë”, kjo është një arritje historike. Pas 20 vitesh, Arsenal rikthehet në finalen e Champions League dhe do të kërkojë trofeun e parë në historinë e klubit në këtë kompeticion.
Skuadra londineze ka zhvilluar një sezon fantastik në Europë, duke arritur në finale pa pësuar asnjë humbje gjatë gjithë rrugëtimit në Champions League.
Në minutat shtesë, Arsenal menaxhoi me qetësi avantazhin minimal dhe nuk i dha shumë hapësira Atlético Madrid për të reaguar. Tani, vëmendja kalon te finalja e Budapestit, ku projekti i Arteta ka mundësinë të marrë vulën e madhe të suksesit.
