Paris Saint-Germain është shpallur kampione e Champions League për sezonin 2025/26, pasi mposhti Arsenal pas goditjeve të penalltive në finalen e zhvilluar në “Puskas Arena” të Budapestit.
Koha e rregullt dhe shtesat u mbyllën në barazim 1-1, ndërsa parizienët triumfuan 4-3 nga pika e bardhë. Penalltia vendimtare u humb nga Gabriel, i cili e dërgoi topin mbi traversë, duke i dhënë PSG titullin e dytë radhazi në Champions League.
Arsenal e nisi finalen në mënyrën më të mirë, duke kaluar në avantazh që në minutën e 5-të. Kai Havertz përfitoi nga një gabim në mbrojtjen e PSG dhe mposhti Safonov me një parabël të saktë.
Në pjesën e dytë, skuadra e Luis Enrique reagoi. Ousmane Dembélé barazoi në minutën e 65-të nga pika e penalltisë, pas një ndërhyrjeje të Mosquera ndaj Kvaratskhelia.
Rezultati mbeti i pandryshuar deri në fund të 120 minutave, duke e çuar finalen te penalltitë. Për PSG gaboi Nuno Mendes, ndërsa Gonçalo Ramos, Doué, Hakimi dhe Beraldo u treguan të saktë. Te Arsenal gabuan Eze dhe Gabriel.
Pas triumfit, Luis Enrique u shpreh i emocionuar për titullin e tretë të Champions League në karrierën e tij si trajner.
“Ky është edhe më i veçantë se viti i kaluar, sepse e dinim sa e vështirë do të ishte ndaj Arsenal. Tani është koha të festojmë me tifozët tanë”, deklaroi trajneri spanjoll.
Edhe Fabián Ruiz foli me emocion pas finales, duke theksuar rëndësinë historike të këtij suksesi.
“Kush do ta mendonte se do të bënim histori me dy Champions League radhazi? Vetëm Real Madrid e kishte bërë më parë, tani e bëmë edhe ne”, tha mesfushori i PSG.
