Një prej bankave më të mëdha në botë, JP Morgan, vlerëson se çmimet globale të naftës mund të rriten, pasi në tregje ende nuk është pasqyruar mungesa reale e furnizimit nga Lindja e Mesme, për shkak të rezervave që kanë shtetet. Ekspertët këshillojnë uljen e konsumit.
Çmimi i naftës në tregjet botërore mund të pësojë rritje të tjera të larta, nëse qeveritë nuk marrin masa për të ulur kërkesën, pas vështirësive të furnizimit nga Lindja e Mesme si pasojë e konfliktit në Iran. Sipas JP Morgan, ndërprerjet globale të furnizimit arritën në 13.7 milionë fuçi në ditë gjatë prillit, ndërsa prodhimi në Gjirin Persik është përgjysmuar. Kjo situatë ka detyruar vendet të shfrytëzojnë rezervat e tyre me ritme alarmante, duke tërhequr rreth 7 milionë fuçi në ditë vetëm gjatë këtij muaji.
Pavarësisht se nafta e papërpunuar është shtrenjtuar ndjeshëm këtë vit, analistët vlerësojnë se çmimet aktuale, që variojnë nga 95-105 dollarë për fuçi, nuk janë mjaftueshëm të larta për të balancuar tregun. Kjo po godet rëndë ekonomitë në Azi dhe Afrikë, por tashmë goditja po ndihet fort edhe në Shtetet e Bashkuara dhe Evropë.
Në SHBA, çmimi i benzinës u rrit me më shumë se 1 dollar për gallon, ndërsa në vendet europiane afërsisht me 20-30 cent për litër. Ekspertët shohin si zgjidhje reduktimin e ndjeshëm të konsumit, ngjashëm me udhëzimet e Bashkimit Europian për kursim. Kërkesa globale tashmë ka rënë ndjeshëm, me një ritëm dy herë më të lartë se gjatë krizës financiare të vitit 2008.
